މިނިވަންކަން

މިނިވަންކަން ރައްކާތެރިވުންއޮތީ عقيد ة ހިފެހެއްޓުމުގައެވެ.

ދިވެހިރާއްޖެއަކީ ކުޑަޤައުމެކެވެ. މީސްކޮޅުމަދު ޤައުމެކެވެ. ޤުދުރަތީ މުއްސަދިކަންވެސް މަދު ޤައުމުކެވެ.މާއްދީ ނަޒަރަކުން ބަލާއިރު ބާރުދެރަ ޤައުމެކެވެ.

ރާއްޖޭގެ ހުރިހާވެސް މުއްސަނދިކަމަކީ، ރާއްޖޭގެ ރައްޔިތުންގެ ޢަޤީދާގެ މުއްސަނދިކަމެވެ. ރާއްޖޭގެ ހުރިހާވެސްބާރަކީ އީމާންކަމުގެ ބާރެވެ. ޢަޤީދާގެ މުއްސަނދިކަމަކީ ކުޑަމުއްސަނދިކަމެއްނޫނެވެ. އީމާންކަމުގެ ބާރަކީވެސެ ކުޑަބާރެއްނޫނެވެ.

މިޙަޤީޤަތަކީ އިސްލާމީ ތާރީޚުގެ ފަތްފުށްތަކުން ވަރަށް ކުލަގަދަގޮތެއްގައި ސާބިތުވެފައިވާ ޙަޤީޤަތެކެވެ. އެންމެފުރަތަމަ އިސްލާމީ ދައުލަތެއް އުފެދުނުއިރު އެދައުލަތުގެ ހިޔާވަހިކަމުގައިތިބި މުވާތިނުންގެ ޢަދަދުވަރަށްވެސް މަދެވެ. ނަމަވެސް ބަދުރުހަގުރާމައިގާ މުޅި ޢަރަބިކަރަ ޙައިރާންކޮށްލި ނަޞްރު ހޯދީ އެބައިމީހުންނެވެ. އެހަނގުރާމައިގާ އެބައިމީހުން ބޭނުންކުރި އެންމެމޮޅުހަތިޔާރަކީ އީމާންކަމުގެ ހަތިޔާރެވެ. މިފަދަ އެތައް ޙާދިސާއެއްގެ ވާހަކަ އިސްލާމީ ތާރީޚްގެ ޞަފްހާތަކުގައި ރަންއަކުރުން ފަވާލެވިފައިވެއެވެ.

އަޅުގަނޑުމެންގެ ދިވެހިރާއްޖެއަކީ އިންޑިޔާކަނޑުގެ ހަލަބޮލި ރާޅުތަކުގެ ތެރޭގައި މާތްﷲ ލައްވާފައިވާ އިސްލާމީ ކިއްލާއެކެވެ. އަމަން އަމާންކަމާއި ސުލްހަމަސަލަސްކަމުގެ ވެސް ކިއްލާއެކެވެ. ރާއްޖޭގެ މިނިވަންކަމާއި ސިޔާދަތު ރައްކާތެރި ކުރުންއޮތީ އިސްލާމީ ޢަޤީދާގައި ހިފެހެއްޓުމުގައެވެ. އެންމެން އެކުވެރިވެ އެކަތިގަނޑަކަށްވުމުގައެވެ.

ސިޔާސީގޮތުން ރާއްޖެ އާމަރުޙަލާއަކަށް ބަދަލުވަމުންދާ ދުވަސްވަރެއްގައި އަޅުގަނޑުމެން ދެނެގަންނަންވީ ޙަޤީޤަތަކީ މިއީއެވެ. ރާއްޖެ އިސްލާމް ވުމަށްފަހު ރާއްޖޭގެ މިނިވަންކަމަށް ކުރިމަތިވި ކޮންމެނުރައްކަލެއް ކުރިމަތިވެފައިވަނީ ދިވެހިންގެ ބަޔަކު އިސްލާމީ ޢަޤީދާއަށް ފުރަގަސްދިނުމުގެ ސަބަބުންނެވެ.

ނޯޓް: މިއީ ދީނުގެ މަގުގެ 1991 ވަނައަހަރުގެ 16 ވަނަޢަދަދުގައި އަލްއުސްތާޛް މައުމޫން ޢަބުދުލް ޤައްޔޫމް ލިޔުއްވާފައިވާ ލިޔުމަކުން ނަގާފައިވާ މަޒުމޫނެކެވެ.

ރަމަޟާން

ބަރަކާތްތެރި މައްސަރެއްވަކިވެގެންދާހިނދު

( މިއީ ދީނުގެމަގު 19 އެޕްރީލް 1991 ގައި މުޙައްރިރުގެ ޤަލަމުން ލިޔުއްވާފައިވާ ލިޔުއްވުމެކެވެ. )

ބަރަކާތްތެރި ރަމަޟާންމަސް އަޅުގަނދުމެންނާ ވަކިވެގެންއެދިޔައީއެވެ. ރޯދަހިފުމާއި، ރޭއަޅުކަން ކުރުމާއި، ރަޙުމަތާއި މަޣުފިރަތުގެމަސް އަޅުގަނދުމެންނަށް އަލްވަދާޢު ކިޔައިފިއެވެ.

ރަމަޟާންމަސް އަޅުގަނދުމެންނާ ވަކިވެގެން އެދިޔައީ، ވަރަށް މަތިވެރި ޢިބްރަތްތަކެއް ލިބިދީފައެވެ. ތަޤުވާވެރިކަމަށް މަގުދައްކައިދީފައެވެ. ހަވާނަފްސުގެ މައްޗަށް ދީނާއި ޟަމީރުގެބާރުގަދަކުރުމުގެމަގު ތަނަވަސް ކޮށްދީފައެވެ. ކެތްތެރިވުމާއި، ރުޅިމަދުކުރުމާއި، ދީލަތިވުމާއި، ހުރިހާކަމެއްގައިވެސް އިހުސާންތެރިވުމަށް އަޅުގަނދިުމެންގެ ނަފްސުތައް ހާނުވައިދީފައެވެ.

މާތް ﷲ ވަހީކުރެއްވިއެވެ. "بَلَى مَنْ أَسْلَمَ وَجْهَهُ لِلَّهِ وَهُوَ مُحْسِنٌ فَلَهُ أَجْرُهُ عِنْدَ رَبِّهِ وَلا خَوْفٌ عَلَيْهِمْ وَلا هُمْ يَحْزَنُونَ 002.112 " މާނައީ: އެހެނަކުންނޫނެވެ.(ހުރިހާކަމެއްގައި ވެސް) އިޙްސާންތެރިވެހުރެ އެމީހެއްގެމޫނު ﷲއަށް ކިޔަމަންކޮށްފިމީހަކަށް، އެމީހާގެވެރި ރަސްކަލާނގެ ޙަޟަރަތްގައި އޭނާގެ ދަރުމަހުއްތެވެ. އަދިއެފަދަ މީހުންގެ މައްޗަކަށް ބިރެެއްނެތެވެ. އަދިއެބައިމީހުންނީ ހިތާމަކުރާނޭ ބަޔަކުކަމުގައިވެސް ނުމެވާނޭމެއެވެ."

މިދެންނެވި ޢިބްރަތްތަކާއި ފިލާވަޅުތަކަކީ، ރަމަޟާންމަސް ދިޔުމުން އަޅުގަނދުމެންގެ ހަނދާނާއި ވިޖުދާނުން ކެހިގެންދާންވީއެއްޗެއްނޫނެވެ.އެޢިބްރަތްތަކާއި ފިލާވަޅުތައްވާންވާނީ، ކުރިޔަށް އޮތް އަހަރުދުވަހުގެ ދިގުރާސްތާގައި އަޅުގަޑުމެންގެ އެންމެގާތް އެކުވެރިންކަމުގައެވެ. އެހެނީ، ﷲއަށް ތަޤުވާވެރިވުމާއި، ހެޔޮޢަމަލްކުރުމާއި، އިހުސާންތެރިވުމަކީ، ވަކިދުވަސްވަރަކަށް ޚާއްޞަ ވެފައިވާކަންކަމެއްނޫނެވެ. މިކަންކަންވާންޖެހޭނީ، ޢުމަރުގެހުރިހާދުވަސްތަކެއްގައިވެސް އަޅުގަނދުމެންނަށް މަގުއަލިކޮށްދޭ ދަންމަރުތަކެއް ކަމުގައެވެ.

ރަމަޟާންމަސް ދިޔުމާއިއެކު، އަޅުގަނޑުމެންނާ ކުރިމަތިލީ، ޢީދުލަފިތުރުގެ މާތްއަދިއުފާވެރި ދުވަސްތަކެވެ. ފިތުރުޢީދު ދުވަހަކީ، ރަމަޟާނަމަހުގެ ރޯދަހިފުމުގެ ތައުފީޤު ދެއްވިކަމަށްޓަކައި މާތްﷲ އަށް ޙަމްދާއި ޝުކުރު ކުރުމުގެދުވަހެވެ. އަދިރޯދަހިފުމުގެ މަތިވެރި އަޅުކަން އަދާކުރެވުނުކަމަށްޓަކައި އުފާކުރުމުގެދުވަސްވެސްމެއެވެ. وكلّ عا م وأنتم بخير .